Mete w prè pou w sove yon vi

Nan yon ijans nwayad, chak segonn konte. Lè w konnen kijan pou w reponn rapid e avèk efikasite, sa kapab fè yon diferans ant lavi e lanmò.
Kit ou se yon paran, yon moun ki bay swen, oubyen yon espektatè, lè w prepare pou w ede nan yon sekou akwatik e pou fè CPR (re-animasyon kadyo-pilmonè), sa kapab ede sove vi anvan entèvenan dijans yo rive.
Seksyon sa a ofri konsèy esansyèl premye sekou, teknik sovtaj, ak konsèy pou pratike CPR pou ede w aji avèk konfyans nan yon ijans akwatik. Nan kesyon sekirite akwatik, sa ki pi enpòtan an se pou w prepare.

Aprann plis nan domèn premye sekou nan men Lakwa Wouj Ameriken

Mete w prè avèk materyèl fòmasyon ak sovtaj

Pwopriyetè pisin ak pwofesyonèl pisin ta dwe suiv yon kou sekirite akwatik pou yo aprann teknik sovtaj apwopriye ak itilizasyon pratik ekipman sovtaj.
Chak pisin ta dwe gen aparèy sovtaj, tankou zouti pou rive pran moun, zouti lansman, pou moun fè sovtaj rapid e an sekirite.
Asire ke gen ensktriksyon CPR ki afiche, ke gen yon mask respiratwa sou lamen e ke gen yon twous premye sekou ak tout founiti sou lamen.

Pran antrènman. Aji avèk konfyans.

Antre nan yon kou fòmasyon!

Fason pou reyalize CPR

CPR oswa re-animasyon kadyo-pilmone kapab ede sove yon vi pandan yon moman arè kadyak, lè kè a sispann bat oubyen li pa bat byen pou fè san sikile ale nan sèvo a ak nan lòt ògàn vital. Sepandan, menm apre antrènman, ka yon defi pou w sonje tout etap ki genyen nan CPR epi pou w fè yo kòrèkteman sou yon moun.
Konbyen konpresyon ou ta dwe fè, e ak ki vitès? Ak ki pwofondè ou ta dwe peze pwatrin nan? Konbyen fwa ou ta dwe bay respirasyon sovtaj? Tout bagay sa yo se faktè enpòtan pou w pran an konsiderasyon pou asire ke ou kapab reyalize CPR wot kalite lè moman an rive. Pou w kab prepare pou w konnen kilè pou w pratike CPR, tanpri li etap annapre la yo.

Fason pou fè CPR konpresyon sèlman

Gade videyo a

Etap CPR sou timoun ak tibebe

Tcheke si sèn nan an sekirite, fè yon premye enpresyon, pran konsantman paran an oswa gadyen an, epi itilize ekipman pwoteksyon endividyèl (PPE).

Si timoun nan oswa tibebe a sanble li endispoze, tcheke timoun nan oswa tibebe a pou wè si li kapab reponn (rele fò-tape-rele fò).

  • Pou yon timoun, rele l fò pou w kapte atansyon timoun nan, sèvi ak non timoun nan si w konnen l. Si timoun nan pa reponn, tape zepòl timoun nan epi rele fò ankò pandan w ap tcheke si li gen respirasyon, si li gen senyman mòtèl oswa si li gen yon lòt kondisyon ki montre klè vi timoun nan menase.
  • Pou yon tibebe, rele l fò pou w kapte atansyon tibebe a, sèvi ak non tibebe a si w konnen l. Si tibebe a pa reponn, tape anba pla pye tibebe a epi rele l fò ankò pandan w ap tcheke si li gen respirasyon, si li gen senyman mòtèl oswa si li gen yon lòt kondisyon ki montre klè vi tibebe a menase.
  • Tcheke pa plis pase 10 segonn.

Si timoun nan oswa tibebe a pa reponn epi li pap respire oubyen li ap esoufle sèlman, RELE 9-1-1 epi pran ekipman, oswa di yon moun fè sa.

Mete timoun nan oswa tibebe a sou do sou yon sifas ki plat e fèm

  • Pou yon timoun, desann sou jenou w akote timoun nan.
  • Pou yon tibebe, kanpe oswa desann sou jenou w akote tibebe a, avèk ranch ou panche tou piti.

Bay 30 konpresyon

Pou yon timoun, mete talon yon men w nan mitan pwatrin timoun nan, avèk lòt men an anwo li epi dwèt tou de men yo makonnen ansanm epi yo pa touche pwatrin timoun nan.

  • Pozisyone zepòl ou egzaktemen anwo men w epi bloke koud ou.
  • Kite bra w dwat.
  • Pouse desann fò e rapid apeprè 2 pous a yon pwopòsyon 100 a 120 pa minit.
  • Kite pwatrin nan retounen nan pozisyon nòmal apre chak konpresyon.

Pou yon timoun piti, sèvi avèk yon teknik CPR yon sèl men.
  • Mete talon yon men w nan mitan pwatrin timoun nan.
  • Pouse desann fò e rapid apeprè 2 pous a yon pwopòsyon 100 a 120 pa minit.

Pou yon tibebe, mete tou de pous ou (kòt a kòt) nan mitan pwatrin tibebe a, egzakteman anba liy pwent tete yo.
  • Sèvi ak lòt dwèt yo pou w ansèkle tòs tibebe a rive nan do li, konsa pou bay sipò.
  • Avèk tou de pous yo an menm tan, pouse desann fò e rapid apeprè 1 pous ½ a yon pwopòsyon 100 a 120 pa minit.
  • Kite pwatrin nan retounen nan pozisyon nòmal apre chak konpresyon.

Osinon, pou yon tibebe, sèvi ak teknik de dwèt la.
  • Sèvi ak de dwèt ki plase paralèl a pwatrin nan nan mitan pwatrin nan.

Pou yon tibebe, si w pa ka rive nan pwofondè 1 pous ½, fè lide itilize teknik yon sèl men an.

Bay 2 respirasyon

  • Pou yon timoun, louvri vwa respiratwa a jiska yon pozisyon lejèman depase pozisyon net la gras a itilizasyon teknik tèt kage/manton leve a.
  • Pou yon tibebe, louvri vwa respiratwa a jiska yon pozisyon net gras a itilizasyon teknik tèt kage/manton leve a.
  • Soufle nan bouch timoun nan oswa tibebe a pou apeprè yon segonn:
    • Asire ke chak respirasyon fè pwatrinan monte.
    • Kite lè a soti anvan w bay pwochen respirasyon an.
  • Si premye respirasyon an pa fè pwatrin nan monte, rekage tèt la epi asire bouch ou kouvri tout ti twou anvan w bay dezyèm respirasyon an. Si dezyèm respirasyon an pa fè pwatrin nan monte, sanble yon objè bloke vwa respiratwa a.

Kontinye bay plizyè seri 30 konpresyon pwatrin ak 2 respirasyon jiskaske:

  • Ou remake yon siy evidan lavi.
  • Yon defibrilatè otomatize ekstèn (AED) pare pou sèvi.
  • Yon lòt entèvenan antrene disponib pou li pran responsabilite fè konpresyon yo.
  • Pèsonèl èd medikal ijan (EMS) rive epi yo kòmanse bay swen.
  • Ou poukont ou epi w twò fatige pou w kontinye.
  • Sèn nan vin danjere.
  • Ou gentan reyalize CPR pandan apeprè 2 minit (5 seri 30:2), ou poukont ou epi w ap okipe yon tibebe, epi ou dwe rele 9-1-1.

Etap CPR sou adilt

TCHEKE si sèn nan an sekirite, fè yon premye enpresyon epi itilize ekipman pwoteksyon endividyèl (PPE).

Si moun nan sanble li endispoze, TCHEKE si li kapab reponn, tcheke respirasyon, senyman mòtèl oswa lòt kondisyon mòtèl, itilize metòd (rele fò-tape-rele fò).

Si moun nan pa reponn epi li pap respire oubyen li ap esoufle sèlman, RELE 9-1-1 epi pran ekipman, oswa di yon moun fè sa.

Desann sou jenou w akote moun nan. Mete moun nan sou do li sou yon sifas ki plat e fèm.

Direktiv CPR Lakwa Wouj Ameriken yo rekòmande 10 a 120 konpresyon pwatrin pa minit, 30 alafwa. Sonje senk pwen sa yo :

  • Pozisyon men yo: De (2) men santre sou pwatrin nan.
  • Pozisyon kò a: Zepòl yo dirèkteman anwo men yo; koud yo bloke.
  • Pwofondè konpresyon yo: Omwen 2 pous.
  • Pwopòsyon konpresyon yo: 100 a 120 pa minit.
  • Kite pwatrin nan retounen nan pozisyon nòmal apre chak konpresyon.

Bay 2 respirasyon.

  • Louvri vwa respiratwa a jiska yon pozisyon depase pozisyon net la gras a itilizasyon teknik tèt kage/manton leve a.
  • Pense nen an pou fèmen li, rale yon souf nòmal, bouche bouch moun nan nèt avèk bouch pa w.
  • Asire ke chak respirasyon dire apeprè 1 segonn epi yo fè pwatrin nan monte; kite lè a soti anvan w bay pwochen respirasyon an.

Remak: Si premye respirasyon an pa fè pwatrin nan monte, rekage tèt la epi asire bouch ou kouvri tout ti twou anvan w bay dezyèm respirasyon an. Si dezyèm respirasyon an pa fè pwatrin nan monte, sanble yon objè bloke vwa respiratwa a.

Kontinye bay plizyè seri 30 konpresyon pwatrin ak 2 respirasyon. Itilize yon AED kou gen youn ki disponib! Minimize entèripsyon ant konpresyon pwatrin yo a mwens ke 10 segonn.

Kilè pou moun pratike CPR?
Moun pratike CPR lè gen yon moun ki pa reponn epi li pap respire oubyen li ap esoufle. Li sèvi pou ede sove vi yon moun lè kè a sispann bat oswa l ap bat twò mal pou sikile san an nan ògan vital yo.
Konbyen konpresyon pa minit pou CPR?
100 a 120 konpresyon pa minit, dapre direktiv CPR Lakwa Wouj Ameriken.
Pandan konbyen tan nou dwe tcheke respirasyon an lè nou ap bay CPR?
Lè nou ap pratike konpresyon ak respirasyon sovtaj, tcheke respirasyon an pa plis pase 10 segonn.
Sa a se enfòmasyon ke Lakwa Wouj Ameriken kreye e pataje.

Konsèy sekirite anplis

Ou bezwen plis enfòmasyon? Nou la pou ede w.

Contact Us